Henri, par la grâce de Dieu Roy de France.

A notre Prevot de Paris, et Seneschal de Lionnois, ou leurs Lieutenants, et à chacun d'eus si comme à lui apartiendra, salut et dileccion.

Reçue avons l'humble supplicacion de nostre chere et bien aymée Louïze Labé, Lionnoize, contenant qu'elle auroit dés long temps composé quelque Dialogue de Folie et d'Amour : ensemble plusieurs Sonnets, Odes et Epistres, qu'aucuns ses Amis auroient souztraits, et iceus encore non parfaits publiez en divers endroits. Et doutant qu'aucuns ne les vousissent faire imprimer en cette sorte, elle les ayant revus et corrigez à loisir, les mettroit volontiers en lumiere à fin de suprimer les premiers exemplaires : mais elle doute que les Imprimeurs ne se vousissent charger de la despence sans estre asseurez qu'autres puis apres n'entreprendront sur leur labeur. POURCE EST IL : que nous inclinans liberalement à la requeste de ladite supliante, luy avons de nostre grace speciale donné Privilege, congé, licence et permission de pouvoir faire imprimer sesdites Euvres cy dessus mencionnées par tel Imprimeur que bon lui semblera. Avec inibicions et defenses à tous Libraires, Imprimeurs et tous autres qu'il apartiendra, de non Imprimer ne faire, vendre, ne faire vendre et distribuer ledit livre cy dessus declairé, sans le vouloir et consentement de ladite supliante, et de celuy à qui premierement elle en aura donné la charge, dans le temps de cinq ans consecutifs, faits et accomplis : commençans au jour et date que ledit livre sera achevé d'imprimer, sans qu'il soit libre à autres Imprimeurs ou Libraires, et autres personnes quels soient et pour quelque impression que ce soit, soit grande ou petite forme, les pouvoir imprimer ou faire imprimer, et exposer en vente, sinon de ceus que ladite aura fait ou fera imprimer, que lesdis cinq ans ne soient expirez, finiz et accomplis. Et ce, sur peine de confiscacion desdis Livres et d'amende arbitraire. De ce faire vous avons donné pouvoir et mandement special par ces presentes. Mandons et commandons à tous nos Justiciers, Officiers et sugets, que à vous ce faisant soit obeï : car tel est nostre plaisir.

Donné à Fontainebleau, le XIII jour de mars, l'an de grace mile cinq cens cinquante quatre. Et de nostre regne le VIII.